Markmið að byggja hvort annað upp
Matey sjávarréttahátíð verður haldin í annað sinn í ár með sama sniði og í fyrra dagana 21-23 september. Fjórir sérvaldir gestakokkar sem eru framarlega á sínu sviði munu matreiða fjögurra rétta seðil í samstarfi við fjóra veitingarstaði bæjarins, Gott, Næs, Slippinn og Einsa Kalda. Hátíðin stóð svo sannarlega undir væntingum í fyrra og ekki verður skafið af því í ár að sögn Frosta Gíslasonar verkefnastjóra hátíðarinnar. Fleiri veitingarstaðir munu taka þátt í hátíðinni og bjóða upp á fiskirétt þessa helgi.
Þótt hátíðin sé aðeins haldin í annað sinn í ár fer hún vaxandi og er eftirsóknarverð upplifun þeirra sem hana sækja, bæði gesta, kokka og annarra. Matey er í grunninn matarhátíð en einnig samspil annarra verkefna til að mynda rannsókna á vegum Háskóla Íslands, ferðaþjónustunnar, tónlistarmanna og jafnréttismála.
“Á Matey erum við að búa til aukna þekkingu, fá inn nýja þekkingu, deila út þekkingu á okkar hráefni og skapa nýja markaði. Markmiðið er að byggja hvort annað upp, sem á eftir að skila okkur í fleiri og dýrmætari ferðamönnum, markaðsetningu á fiski og sýna hversu vel er hugsað um fólkið okkar og náttúruna”, segir Frosti.
Við hvetjum fólk til að kynna sér hátíðina, taka þátt og tala hana upp. Til þess að slík hátíð geti orðið aftur þurfum við að taka þátt og fjárfesta í framtíð okkar hér í Vestmannaeyjum.
Mynd: Karl Petersson.